ناساندنی کتێبی:
"گوڵی ساردۆنیا"
ئەو کچەی ڕقی لە ناوی خۆی بوو!
نوسەر: ئەلیف شەفەق
وەرگێڕ: سامان مامڵێسی
ژانر: ڕۆمان
پەخشانگە: ناوەندی رۆشنبیری ئەدیبان
چاپی یەکەمی ساڵی ٢٠٢٠، بە تیراژی ١٠٠٠ دانە
١٤٦ لاپەڕە
نرخ: ١٠٠٠/ هەزار دینار
----------------------------------
ئەم کتێبە یەکێکە لە کتێبەکانی نوسەری تورک:
ئەلیف شەفەق، کە زیاتر بە نوسەری ڕۆمانی "چل ڕێساکەی عەشق" ناسراوە.
کتێبەکە بەشێکی زۆری خەیاڵییە و، سادەیە کاتێکی کەم دەبات بۆ خوێندنەوە، بەڵام هەڵگری چەند پەیامێکە....
بە تایبەتی ئەوەی کە منداڵ مافی بەسەر دایک و باوکییەوە هەیە، تا گەورەش دەبێت مافی تری دەبێت کە دەبێت لە ئەستۆی بگرن. ئەمەی لێرەدا زیاتر باسی دەکات ناوە، ناوی ساردۆنیا، کارەکتەری سەرەکی ڕۆمانەیەکە کە لە ناوی خۆی ڕازی نییە. کە ناوی گوڵ'ێکیشە، بە هۆی ناوەیەکەیەوە گاڵتەی پێدەکرێ و ئەمیش ڕووبەڕووی چەند بارودۆخی دەروونی ناخۆش دەبێتەوە.
ــــــــــــــــــــــــــــــــــــــــــــــــــــــــــــــــــــــــــــــــ
ئەم کتێبە هەر وەک کتێبەکەی پێشوو ( شازادە بچکۆلە) هەمان پەیامە بۆ کەسە "گەورەکان"، بەڵام ئەمەیان زیاتر بۆ دایک و باوکانە.
کاتێک شازادە بچکۆلە و ساردۆنیا گوێیان لێناگیرێ پشتگوێ دەخرێن، قسەیەک دەکەن کە لەیەکەوە نزیکە...
شازادە چکۆلە دەڵێ:- ( هەر بە راست بە راست ئەم مرۆڤە گەورانە زۆر زۆر سەیر و سەمەرەن!)
گوڵی ساردۆنیا دەڵێ:- ( ئای خودایە، چەند قورسە هەندێک شت بۆ گەورەکان ڕوون بکەیتەوە!)
ــــــــــــــــــــــــــــــــــــــــــــــــــــــــــــــــــــــ
* وە نوسەر سەرنج دەخاتە سەر منداڵانی ئەمڕۆ کە چۆن گیرۆدەی تەکنەلۆژیای سەردەم بوونەتەوە و جوڵە و ئاستی داهێنانیان کەم بووتەوە،......
( + ئێستە منداڵەکان وەکی پێشان نەماون، کتێب ناخوێننەوە، خەون بنیات نانێن، تەنیا یاری بە مۆبایل دەکەن و هیچی دی.
ــ ساردۆنیا بە ناسیکییەوە وتی:"خوشکێ، منیش یاری بە مۆبایل دەکەم.
+ ئێ با بیکەن، هیچ ڕێگرێک نییە بەس با کتێبیش بخوێننەوە، چونکە بنیادەم پێویستی بە هێزی خەیاڵیش هەیە........)
----------
سەرنجێک/ منداڵ هەر لاسایی ئێوە دەکاتەوە، تۆی دایک و باوک گەر هەر مۆبایلت بەدەستەوە بێت، ئەوا منداڵ هەر وەک تۆی لێدێت.
ـــــــــــــــــــــــــــــــــــــــــــــــــــــــــــــــــــــــــــــ
چەند دێڕێکی ناوی ڕۆمانەکە:
* وەڵامدانەوەی گەورەکان بۆ ئەو بابەتانەی حەزیان بە بیستنی نییە،یان وەکی ئەوە وایە هەر بەر گوێشیان نەکەوتبێت، یانیش زەردەخەنەیەک دەکەن و پێچێک بە بابەتەکە لێ دەدەن، جاریش هەیە توڕە دەبن و سەرزەنشتمان دەکەن، بۆیە دواتر فوویەک لە چراکە دەکەن و بابەتەکەیش خۆمان خۆش!
* ساردۆنیا توانای هەڵهێنانی ئەو مەتەڵەی نەبوو، داخۆ بۆ چی هەموو خەڵکی گرینگی بە ماڵەکانیان دەدەن و ئەو شارەی تێیدا دەژین، پشتگوێ دەخەن! قوتووە بەتاڵەکان لە جامی ئۆتۆمبێلەکانەوە فڕێ دەدەن. پاشماوەی خواردنەکانیان دەکەنە ئەو ناوە و نایکەنە تەنەکە زبڵەکەوە!
نازانم چۆن دەتوانن لە جادە و بانەکان پیس و پۆخڵ بن و بۆ ماڵەکانی خۆیشیان پەڵەیەک بە کەمتەرخەمی بزانن؟ بێگومان ئەوە یەکێک بوو لە نهێنییەکانی گەورەکان، کە ساردۆنیا نە لێی تێدەگەیشت و نە هاوكێشەکەیشی بۆ شیکار دەکرا!
* ئەوەی شتێک هەر لە خۆوە بڵێت و بێ بیرلێکردنەوە، دیسان قسەی گەورەکانە کە ساردۆنیا لێی تێنەدەگەیشت. ئەی کە وایە، بۆچی خەڵکی قسەیەک دەکەن کە خۆیان هەڵیدەبژێرن، بیری لێناکەنەوە یانی چی؟ ئەو قسانە بەبێ ڕوخسەت لە دەم دەردەچن؟
* خەڵکی ئەوەندە سەرقاڵن، بیر لە سەیرکردنی ئاسمان هەر ناکەنەوە
* ئەوە گرنگ نییە خەڵکانی دیکە چۆن بیر لە تۆ دەکەنەوە.
دەکرێت خەڵک پێت پێبکەنن، وەلێ ئەوە یانی کێشەکە
لە واندایە نەک لە تۆدا. پێویستە بە هێز و لەسەرخۆ بیت، ئەودەم نە قسەی کەس ئازارت دەدات، نەیش بێزار.
* هەندێ جار تۆ نازانیت ئەوی دیکە چی دەڵێت، نەک لەبەر ئەوەی قسە ناکات، بەڵکوو لەبەر ئەوەی تۆ گوێی بۆ ناگریت.
* هەموو شتێک بە پێی ئەو شتەی دەیبینێت، دەگۆڕێت.
جا ئەو کەسەی لە دیدی کەسێکدا زەبەلاحە، بە تێڕوانینی یەکێکی دیکە لەوانەیە گرگن بێت.
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
من کاتێ لە پۆلی ٨ی ناوەندی بووم، لە پۆلەکەی خۆمدا گەر هەڵە نەبم ٣١ کەسێک بووین، یان ٢٩ کەس کەمتر نەبووین.
جا بەخۆشمەوە لە پۆلەکەدا ١٧ محەمەد بووین، ئەوە هەر باش بوو ناوی باوکمان لێک نەدەچوو.
-----------
ئامادەکردنی: محەمەد قوباد
٢٠٢٠/٥/١٠ - کۆیە.
ليست هناك تعليقات:
إرسال تعليق